VERDSARVPARKEN

Nærøyfjorden Verdsarvpark 

Som stifting og regional park inkluderer Nærøyfjorden Verdsarvpark område, aktørar og produkt i fjordnorge som aktivt har valt verdsarven som verdiplattform. Kjerneområdet er Nærøyfjorden Verdsarvområde, det sørlegaste av dei to områda innskrivne som Vestnorsk Fjordlandskap på Verdsarvlista - UNESCO si liste over kultur- og naturarv av eineståande verdi. Likevel femner Verdsarvparken om eit større område enn sjølve verdsarvområdet, og gjeld heile Aurland kommune, samt delar av Vik, Voss og Lærdal kommunar.

Regionalpark

Nærøyfjorden Verdsarvpark er den første norske utgåva av eit kjent europeisk konsept kalla regionalpark (www.regionalpark.no). Nemninga viser til at verdiskapinga tek utgangspunkt i regionen eller lokalsamfunna sjølve. Kvalitetane som har gitt området verdsarvstatus skal ivaretakast ved utvikling av engasjerte og bærekraftige lokalsamfunn. Bærekraftig vern føreset at dei som bur og verkar i området identifiserar seg med området sine kvalitetar og får høve til å vidareutvikle dei. Verdsarvparken har som målsetting å vere pådrivar for ei natur- og kulturbasert samfunnsutvikling med forankring i verdsarvstatusen til Nærøyfjordområdet.